一向係NBA明星賽主打節目之一嘅入樽賽，尋日終於公布名單，當中紐約人球星尼特羅賓遜再度入選，並趁「大帝」勒邦占士臨時甩底，好大機會成功衞冕，尋日佢就率先喺對活塞一仗大發神威，射入27分壯聲威！

NBA尋日正式公布今屆明星賽入樽賽球員名單，早前講到一定會參加嘅騎士球星勒邦占士突然甩底，取而代之係紐約人嘅尼特羅賓遜、山貓嘅謝勒華萊士同湖人嘅沙朗布朗，至於最後一個名額就會通過附加賽產生，速龍新秀迪羅辛同快艇二年生艾歷哥頓會喺2月12號進行嘅新秀賽中場休息時進行PK，由球迷喺官網即場投票決定勝負，勝出者會聯同以上3位球員，喺農曆大年初一為球迷上演入樽賽。

5個3分波射死活塞

唔知係咪收到呢個消息太興奮，尼特羅賓遜尋日作客活塞一仗着晒火，一下「拆你屋」贏盡球迷掌聲，仲射入今季個人新高5個3分波，最後射入27分，帶領紐約人主場以99:91擊敗活塞。賽後尼特羅賓遜得戚咁話自己唔淨止識入樽，大呼：「我係一個好全面嘅球員。」

放大圖片	放大圖片	放大圖片

不過講到底，紐約人尋日贏波，唔多唔少因為活塞陣容超殘，繼哥頓、普林斯同韋爾拜林受傷後，咸美頓尋日又因胃痛缺陣，活塞聽日主場對住有拉舒華萊士復出倒戈嘅塞爾特人，睇怕戰情將會一面倒，「綠軍」讓9分上盤靠得住！