繼高比拜仁早前負傷上陣頻頻創出得分新高後，熱火球星韋迪近期亦有樣學樣，尋日使用「機械臂」更獨取37分，帶領熱火作客以115:106射落火箭。
自從禮拜一對爵士拉傷右手手臂後，熱火球星韋迪可以話愈傷愈勁，繼上仗喺贏勇士一仗攞到35分後，尋日作客火箭時更取得37分兼有8次助攻，帶領熱火取得近5場比賽第3場勝利。賽後韋迪透露自己右手手臂仲係好痛，相信今季尾都好唔番，但就話唔係壞事，因為受傷令佢射波時增加咗弧度，提高咗命中率：「我覺得受傷反而令我射波更機械化。平時我射波係平飛，出手嗰吓唔會拗得太後，力量太集中喺右手，唔夠平衡。但自從受傷後，我出手嗰吓嘗試提高啲，點知射波反而仲準咗。」
另邊廂，小牛教練卡素爾喺半場命球員喺下半場加強防守，結果令雷霆由上半場接近50%嘅命中率下跌至36%，加上魯域斯基射入32分，主場以99:98險勝雷霆，相信小牛聽日作客速龍將會照辦煮碗，以防守行先，大細中位數係195.5分，細盤可以一試。