大衞李爾化悲憤為力量！呢位紐約人中鋒前日迎來噩耗，雖然收到祖父去世嘅壞消息，但依然強忍悲痛堅持上陣，仲喺關鍵時候絕殺得手，協助紐約人以93:92險勝76人，夠晒專業！

尋日紐約人造訪76人，賽前大衞李爾得知祖父不幸過身，當堂喊到眼都腫埋，諗住執拾行李離隊奔喪，但喺最後一刻改變主意，決定留低同一班隊友並肩作戰。卒之佢攻入全場最高嘅24分，仲喺完場前13.3秒射入絕殺入波，成為紐約人嘅贏波功臣。

心情沉重嘅大衞李爾賽後話：「我身為紐約人領袖，有責任去履行做隊長嘅責任，贏波唔係我一個人嘅功勞，其他隊友都付出咗好大努力。」翻查數據，紐約人對上9次造訪76人都輸晒，今場勝仗當然為全隊上下打入強心針。

士氣大振讓得起速龍

既然紐約人士氣大振，咁就一定要追。佢哋聽朝喺主場恭候速龍，客軍上仗對住處於低潮嘅溜馬都輸得已經激死人，陣中王牌保殊亦盛傳會過檔湖人，軍心不穩，紐約人小讓1分梗要上盤！