近況大勇嘅快艇，尋日作客灰熊因為喺比賽中途突然遭遇「水災」，緊急疏散後擾攘超過半小時先開番波，結果被打窒道氣，最終畀灰熊反勝104:102，令取得「三雙」嘅巴朗戴維斯功虧一簣。

警鐘誤鳴打窒道氣

快艇尋日作客灰熊喺上半場順到冇人有，一度拋離對方18分，但去到完第3節47秒時，當巴朗戴維斯射入罰球領先89:77後，灰熊主場突然響警鐘，分牌打出叫所有人緊急疏散嘅字句，結果所有球員、球證同球迷雞咁腳走，擾攘足足36分鐘，雙方先再返入球場比賽。據講警鐘之所以響，係因為場館低層有地方爆水喉。

結果呢次警鐘誤鳴，扭轉晒成場波嘅局勢，快艇一班球員返嚟後團火熄晒，相反灰熊定神後，打出一段27:13嘅攻勢，最終反勝2分完場，終止快艇4連勝走勢。賽後灰熊主將美奧都有啲唔好意思：「比賽突然延遲實在不幸，的確些微改變咗局勢。」其實快艇尋日真係打得唔錯，主將巴朗戴維斯更攞到27分、12個籃板同12個助攻，成為目前仍然活躍喺NBA中，第8位取得10次或以上「三雙」嘅球員，兼成為快艇近7年首位取得「三雙」嘅戰將，遺憾未能帶領快艇贏波。

放大圖片

放大圖片

最後預告埋聽日嘅賽事，爵士喺「新史托頓」迪倫威廉士復出後，連續兩場得分過110分，主場對住勒邦占士領軍嘅騎士未必輸梗，一於捧大盤。