本文重點
公鹿流年不利連環噩耗！估唔到踏入2010年唔夠半個月，公鹿已頻頻出現「血光之災」，繼王牌球星米高列特一年內兩度韌帶撕裂提早收咧後，教練史卡奧斯尋日突然心律不整被送入院，結果將帥齊缺陣嘅公鹿，作客以101:105不敵太陽，喺近10年最恐怖嘅作客之旅上，睇嚟仲有排捱。
公鹿王牌球星米高列特日前喺對湖人時受傷離場，賽後證實同一年前一樣，左膝十字韌帶再次撕裂，宣布今季提早收咧。平常球員斷一次十字韌帶，好多都打唔番之前嘅水準，何況喺一年內斷兩次，所以有好多NBA球評家認為，米高列特有可能因為今次受傷，提早結束NBA生涯。
教練入院不敵太陽
唔知係咪因為過分擔心米高列特，公鹿教練史卡奧斯尋日喺作客太陽前夕出席記者會後，心跳突然不規則咁跳動，被緊急送院，臨時由助教保蘭領軍。結果公鹿喺失去將帥下，雖然有華域克射入21分，可惜臨尾香，最後僅以4分之差不敵太陽。
賽後保蘭透露史卡奧斯出現輕微心律不整，但依家已經好番好多，嚟緊作客拓荒者可以復出，但其實公鹿依家係打緊近10年最長嘅作客之旅，10日內將打6場作客賽事，繼之前連續作客輸畀湖人同太陽後，嚟緊仲會作客拓荒者、勇士、爵士同火箭，場場都好惡啃，真係唔知史卡奧斯個心臟負唔負荷得到！