本文重點
下個月18號就係NBA轉會Deadline，列強都磨拳擦掌準備做交易，其中火箭就極有機會羅致巫師前鋒卡朗畢拿，意味住阿利沙隨時冇碇企！阿利沙如果想自保嘅話，真係要盡快打出身價，聽朝對住弱旅木狼正好係攞威良機！
查實阿利沙着得1號波衫，就知會方想搵佢取代王牌麥基迪，奈何阿利沙今季加盟之後表現飄忽，被球迷冠以「浪射王」污名，就連教練阿杜文都對佢有微言。據《紐約郵報》爆料，有7間球會對火箭球星麥基迪虎視眈眈，當中巫師就希望以卡朗畢拿交換T-Mac。
火箭讓7.5分抵捧
消息指火箭對卡朗畢拿流晒口水，一旦成事，對同樣司職小前鋒嘅阿利沙影響最大。其實阿利沙近排已經頻頻苦練中距離投射，聽朝對手木狼近8仗輸足7場，睇嚟係佢省靚招牌嘅黃金機會，火箭主場讓7.5分一於捧上盤。