以真路比利為首嘅一班後備兵尋日大發神威，合力攻入58分，帶領馬刺主場以97:85撕破籃網，聽日主場硬撼湖人，有望乘勝追擊再下一城，受讓1.5分下盤值博！

馬刺尋日喺開賽初段比較慢熱，結果造就一班後備兵上位，其中阿根廷球星真路比利最搶眼，交出幾球靚助攻，又fadeaway兼入3分波，最後射入全隊最高嘅21分。

主場乘勝追擊湖人

不過講到震撼，都唔及馬軒美，事關呢位上季重傷冇出過場，尋日自07-08年球季後首次上陣嘅後備中鋒，取得職業生涯新高嘅15分兼有9個籃板，加上羅渣美臣同佐治希爾分別有7分同10分進帳，最終協助馬刺輕取籃網，連續14次擊敗對手。

放大圖片

放大圖片

贏埋呢場後，馬刺唔經唔覺已經升上西岸第3位，聽日佢哋將會喺主場硬撼西岸一哥湖人。雖話湖人尋日都喺主場贏公鹿95:77，不過加素卻因傷再次缺陣，睇怕聽日都趕唔切復出，面對馬刺一班奇兵，絕對有陰溝裏翻船嘅隱憂。