本文重點
雖然金塊(圖左)同巫師尋日各自缺少主將安東尼同亞連拿斯，但反而激發起隊友嘅鬥志，最後分別勇挫東岸兩大勁旅騎士同魔術，爆出冷門。
巫師主將亞連拿斯日前因為喺球場上擺出開槍「甫士」，結果被聯盟無限期停賽。巫師為免畀亞連拿斯影響其他球員嘅情緒，尋日喺賽前將球場上所有關於亞連拿斯嘅海報撕掉，搬走晒佢喺更衣室入面嘅物品，結果巫師憑占美臣獨取28分同11個籃板，反勝魔術104:97。
騎士鬥拓荒者勢反彈
至於今季狀態大勇、分屬03年新秀狀元同榜眼嘅勒邦占士同安東尼，本來尋日有機會正面硬撼，可惜安東尼因傷缺陣，不過金塊仍憑比立斯射入23分，助金塊贏騎士99:97。雖然騎士輸波，不過勒邦占士就話滿意球隊演出，仲話聽日作客拓荒者可以反彈，咁又係嘅，拓荒者受傷兵困擾，實力大減，平手盤撐騎士有着數！
