06/01/2010

播放本新聞相關短片

黃蜂客場腳軟聽畀雷劈

要數當今NBA最有前途嘅控衞,又點少得爵士嘅迪倫威廉士同黃蜂嘅基斯保羅。尋日兩人正面交鋒成為全日焦點,雖然「D-Will」創新里程碑,可惜爵士最後喺主場仍以87:91不敵由「CP3」基斯保羅帶領嘅黃蜂。

論個人數據,「D-Will」迪倫威廉士喺尋日呢場控衞大戰明顯較好,全場有17分同11次助攻,職業生涯助攻成功突破3,000次大關,成為爵士史上第4人。可惜「D-Will」喺完場前45秒卻犯下大錯,被黃蜂嘅基斯保羅捉到路偷咗個波兼成功上籃,成為爵士3連敗嘅罪人。

其實尋日呢場勝仗,只係黃蜂今季作客第3場贏波,全場有12分同9次助攻嘅基斯保羅賽後就表示,希望呢場勝仗可以令隊友重新振作:「希望呢場勝仗可以畀到隊友信心,令大家明白到我哋係一支好球隊,有能力作客贏波。」可惜黃蜂聽日作客遇着嘅,係尋日客場大勝公牛98:85嘅雷霆,睇怕都好難有運行,受讓4分都係捧番上盤為妙。

大衞李風