本文重點
亞連拿斯「藏槍案」愈鬧愈激！美國《紐約時報》近日爆出驚人內幕，踢爆早前藏槍嘅亞連拿斯，原來曾經因為賭債問題同隊友基坦頓發生衝突，結果齊齊拔槍互指對方，不過亞連拿斯已否認以上傳聞，NBA同警方就表示會認真調查。
坐飛機輸啤牌唔認數
花名「Agent Zero」嘅亞連拿斯，早前被發現喺更衣室儲物櫃藏有未上彈嘅手槍，亞連拿斯解釋因為唔想啱啱出世嘅女喺屋企有意外，所以將支槍攞番球會儲物櫃。
不過一名匿名人士，近日喺《紐約時報》撰文時大爆，亞連拿斯早前同隊友基坦頓喺飛機上玩啤牌輸錢，基坦頓喺平安夜當日喺更衣室追亞連拿斯錢，唔認數嘅亞連拿斯覺得對方好煩，於是一怒之下拔槍指向基坦頓，後者之後亦有拔槍。
對於呢單傳聞，亞連拿斯已經否認，更揚言將會控告《紐約時報》：「我明白呢件事好嚴重，但如果你識我，一定知我唔會咁做。」亞連拿斯嘅老竇亦為佢個仔辯護：「關於佢哋兩個喺更衣室用槍互相指向對方，我覺得好荒唐。」
不過巫師方面就好緊張，並發表聲明：「調查正認真地進行，我哋會繼續全力配合警方同NBA。」