本文重點
成也朗度、敗也朗度！塞爾特人新進控衞朗度尋日作客快艇表現一直好好，點之喺緊張關頭竟然壓力爆煲，射失2個關鍵罰球，成為「綠軍」被快艇戲劇性反勝92:90嘅罪人。
雖然今季簽入前活塞球星拉舒華萊士，不過塞爾特人今季整體表現反而冇前兩季咁好，加納特、雷阿倫都明顯有跌Watt迹象，皮雅斯最近更加傷埋，搞到尋日作客快艇，要由新進控衞朗度一個人孭晒飛。其實佢喺頭47分30秒都打得好好，有20分同6次助攻，但喺完場前嘅關鍵時刻，佢明顯抵受唔住壓力，連續射失兩個罰球，喺完場前1秒，朗度更被快艇嘅巴朗戴維斯喺自己面前入一個超遠2分波，累「綠軍」輸波。
公牛球員撐教練
賽後塞爾特人教練李華士都批評球隊今季表現比預期中曳：「對於一支充滿經驗嘅球隊嚟講，我哋應該時時刻刻都沉着而戰，但我哋打落實在唔似一支充滿經驗嘅球隊。」
同日美國《ESPN》爆料，指公牛一早決定炒教練迪尼高，可惜一直搵唔到繼任人選，所以到依家都未踢走佢，不過公牛日前喺特魯斯湯馬士復出下立即擊敗黃蜂，似乎一班球員仲好撐迪尼高，所以聽日公牛主場對住啱啱以34分慘敗畀熱火、錄得6連敗嘅溜馬，讓6分上盤可以話幾抵玩！