NBA明星賽陣容又有變數！經過第2輪投票之後，76人後衞艾佛遜同太陽球星拿殊分別殺入東西岸嘅正選陣容，其中拿殊仲取代火箭球星麥基迪成為西岸正選後衞，但T-Mac本人並唔介意，事關佢表明就算選到都唔會打明星賽，但就感謝有份投票嘅中國球迷！

將會喺明年2月於達拉斯舉行嘅明星賽，早前公布第2輪投票結果，其中西岸湖人嘅高比拜仁不負巨星本色，以138萬得票率先成為全NBA嘅票王！至於勒邦占士雖然以135萬張選票屈居次席，但已經係全東岸得票最多嗰個！

T-Mac謝中國球迷支持

其實經過次輪投票之後，東西岸陣容都有變動，好似「AI」艾佛遜自從回歸76人之後，喚起唔少球迷注意力，紛紛投票令佢打入東岸明星隊嘅正選後衞之一。另外，今季表現回勇嘅太陽控衞拿殊亦得到54萬票，令佢拍住高比拜仁成為西岸兩大正選後衞！

由於拿殊突然殺出，令火箭球星T-Mac失落咗西岸正選後衞席位，但都唔怕啦，因為佢都無諗住打明星賽：「我唔會參賽，但為咗多謝大家嘅支持，我到時依然會出席，我明白有9成得票係嚟自中國球迷，無論乜嘢情況佢哋都好支持我，真係好感激。」