本文重點
唔知係咪為咗博表現入選美國隊，出戰下年舉行嘅世錦賽，拓荒者孖寶萊爾同艾迪列治尋日打得特別落力，最終兩人合共射入42分，帶領拓荒者主場以105:102反勝鳳凰城太陽！
拓荒者長期受傷兵困擾，表現時好時壞，尋日佢哋主場對太陽，喺第3節更加一度落後15分，不過拓荒者最終憑萊爾獨取27分，艾迪列治獲得15分，加上後備控衞比歷斯大發神威，取得職業新高29分，佢仲喺完場前9秒射入3個罰球，最終助拓荒者反勝太陽取得2連勝。賽後拓荒者教練麥美倫大讚比歷斯：「比歷斯把握出場機會交足功課。我哋都知佢好射得，喺咁多傷兵嘅情況下，我哋真係好需要佢。」
博表現爭入國家隊
美國籃協尋日公布下年8月喺土耳其舉行嘅世錦賽名單，之前京奧奪金嘅一班主力，包括高比拜仁同勒邦占士等球星都有入選。美國男協主席高蘭格奴表示，佢哋初步會選25至27人預備世錦賽，仲話明想搵多啲高大球員：「只要我哋認為某位球員值得入選，就會考慮畀佢入國家隊，我哋唔排除任何球員入選嘅可能性。」
據講拓荒者孖寶萊爾同艾迪列治都喺候選之列，相信嚟緊佢哋都會搏到盡，聽日拓荒者作客魔術對住大師兄杜域侯活，正好畀機會佢哋證明自己嘅能力，拓荒者受讓8分，下盤絕對值博。