「T-Mac」終於復出啦！麥基迪尋日喺養傷10個月後，再次重返NBA戰場。雖然只係上陣唔夠8分鐘，但已經high爆全場。改着3號嘅佢，更加重新做人唔做大佬，帶挈新人布丁加發威，助火箭主場以107:96拔走活塞！

由於阿利沙停賽，火箭尋日變陣，派出新人布丁加擔正，而「T-Mac」麥基迪更喺開賽前90分鐘獲教練阿杜文通知會獲派上陣，結果麥基迪喺第一節後備入場，相隔309日後再次披甲，全場球迷都為佢起立鼓掌。雖然「T-Mac」入場後只射入一球3分波，但火箭正正喺麥基迪入場後，由落後9:11，到第一節完反領先10分。麥基迪入場後，火箭淨勝活塞12分呢項數據，更係球隊紀錄。

新仔布丁加發威

雖然麥基迪全場只係上陣7分44秒，但今季改着3號嘅佢並冇唔滿意，反而覺得睇住新人布丁加喺職業生涯首次正選上陣取得16分同12個籃板覺得好開心。

賽後麥基迪對於重返球場覺得好正，對於再次同一班隊友合作好開心，並大爆之前嘅操練比尋日打波仲辛苦，好鍾意火箭新嘅「跑轟戰術」。最後麥基迪更話打得7分鐘其實唔夠喉；「我冇疲累嘅感覺，真係令我好吃驚，我嘅呼吸仲好順，其實我仲可以打多陣。」

不過教練阿杜文已揚言，嚟緊幾場比賽，會繼續安排麥基迪每場上陣時間大約喺7分鐘左右，以評估麥基迪嘅康復程度：「麥基迪知道點樣去比賽，好似帶波帶到籃底，佢知點做會博到對手犯規。但由於受傷，麥基迪未去番以前嘅水平，我哋希望佢可以推動自己搵番昔日嘅狀態。」

放大圖片

放大圖片

另外，尋日熱火主場以115:95大勝速龍，但韋迪表現只係麻麻得19分，聽日繼續喺主場對魔術如果表現再冇改善，睇怕都好難頂得住杜域侯活，魔術讓2分上盤博得過！