T-Mac意外獲高票

今季狀態大勇嘅高比拜仁，喺首輪點票中，獲得692,518票，比韋迪多出超過2萬票，至於「大帝」勒邦占士、「小甜瓜」安東尼、「野獸」杜域侯活都喺所屬位置遙遙領先，基本上穩奪明星賽正選。唯一較令人意外嘅係，今季因傷、1分鐘都未打過嘅火箭球星麥基迪，竟然力壓拿殊、基斯保羅同傑特，攞到281,545票，跟隨高比拜仁之後排西岸後衞第2位，原來全世界仲有好多球迷撐「T-Mac」。

如果大家唔想有漏網之魚冇得打明星賽，就記住喺1月18號前去nba.com進行網上投票喇，好似爵士大前鋒布沙同後衞迪倫威廉士咁，近期打到着晒火，但前者暫時喺西岸前鋒一欄竟然十甲不入，迪倫威廉士亦僅僅攞到94,715票，喺西岸後衞一欄排第10，明顯受冷落，嚟緊肯定騷哥利拉票，可惜聽日偏偏撞正大勇嘅湖人，怕且打到曉飛都冇用，湖人狠讓11.5分，上盤仍然值博！