只得19歲嘅大迫勇也，今年先至高中畢業，但係2月份已經披起鹿島鹿角球衣踢職業賽，今季佢喺聯賽為鹿島總共披甲849分鐘，足以反映呢條g仔有幾厲害。

你咪睇少849分鐘呢個數，日職規定J1球會簽嘅年輕球員，只要踢聯賽或者國腳級比賽，達到450分鐘以上，球會就要同佢簽署無年薪上限嘅A契約。本來只係簽年薪上限480萬日圓（約41萬港元）C契約嘅大迫，半季唔使已經改簽A契約大幅加人工，比起一般日本高中畢業生嘅17萬港紙平均年薪高兩、三倍。加埋adidas又嘜咗佢，以每年約87萬港元簽咗大迫做代言，即係話佢一年嘅總收入，肯定超過百萬港元，夠晒誇張。究竟呢個g仔為乜咁值錢？今日睇吓咪知囉。