貴為昔日NBA頂級後衞之一，艾佛遜尋日喺復出後第2戰繼續冇料到，上陣33分鐘只得11分同3次助攻，反而失誤多達6次，表現完全被活塞新進後衞史杜基蓋過。呢位新仔尋日獨取27分、5個籃板同8次助攻，包括完場前8.7秒射入一個關鍵入波。賽後史杜基獲得活塞教練古斯達大讚：「我好放心將個波交喺史杜基手上，大家可以睇到佢有好大進步，我相信佢一定可以成為聯盟最佳後衞之一。」

艾佛遜復出後，76人打2場都輸，加埋之前効力灰熊打嘅3場又輸波，原來「AI」今季仲未開齋，聽日喺主場對住實力喺佢哋之上嘅火箭，怕且仲未係時候反彈，不過火箭讓8分略嫌過咗火位，76人應該可以收窄落敗距離開出下盤！