本文重點
萬眾期待嘅「AI」艾佛遜，尋日終於正式復出為76人處子上陣，獲得球迷盛大歡迎，可惜表現雷聲大、雨點小，76人主場仍然不敵金塊83:93，即管睇吓聽日主場對活塞可唔可以成功反彈！
明撼活塞信得過
為一睹艾佛遜再次代表76人比賽，76人尋日主場對金塊，錄得今季首次爆棚，大量球迷着上「AI」經典嘅3號波衫，以及拉起支持「戰神」嘅橫額入場睇波。賽前76人為「AI」舉行盛大嘅歡迎會，呢名76人一代Icon好識做，入場後跪地親吻球場中央嘅76人logo地板。不過由於已經太耐冇比賽，艾佛遜明顯唔喺狀態，正選上陣38分鐘，只得11分、5個籃板同6次助攻，但每次攞波仍然獲得球迷熱烈歡呼。其實76人尋日打得唔曳，「AI二世」伊古達拉仲入咗31分，可惜喺第3節同第4節之間，被金塊打出一段22:3嘅攻勢，成為落敗嘅關鍵。
雖然輸波，但無損「AI」興奮嘅心情：「我覺得今日就好似返咗屋企一樣，有種似曾相識嘅感覺。球迷嘅熱情搞到我比預期緊張。」
輸埋呢場後，76人經已累積10連敗，不過「AI」表示有信心帶領76人走出谷底：「今晚我睇隊友嘅表現，真係唔明佢哋之前點解會連輸9場。不過我哋嚟緊一定會團結，請相信我！」正正係以上一番肺腑之言，芝士認為艾佛遜聽朝主場再鬥另一支効力過嘅球會活塞，受讓5.5分下盤一定要捧。