太陽賽程惡啃現疲態

太陽近排賽程認真惡啃，10日內分別要到6個城市比賽，結果亦因為舟車勞頓，近排水準大跌，對上4場輸足3場，平均每場輸21.3分，尋日作客湖人，全場更陷入劣勢，去到第3節仲被湖人打出一段15:1嘅攻勢，喺3分半鐘內未入過一球，一度落後23分，結果太陽喺最後一節索性收起拿殊、史杜迪米亞同格蘭希爾等主力。

太陽尋日輸波另一個關鍵，喺主將史杜迪米亞被湖人「防守專家」阿堤斯成功凍結，只得18分。全場只有12分嘅格蘭希爾承認：「近排我哋實在有太多作客賽事，真係好難應付。」湖人尋日贏在夠全面，全隊有6人得分達雙位數字，其中「小飛俠」高比拜仁繼續發揮水準，獨得26分同7個籃板，阿堤斯亦取得15分同平今季新高嘅5次偷波，都係湖人嘅贏波功臣。

聽日太陽作客小牛，睇怕都難逃一劫，畢竟小牛今季主場成績唔錯，有6勝3負，主將魯域斯基同泰利近排都有穩定演出，攰到爆嘅太陽依家作客居然要倒讓3.5分實在離晒譜，冇理由唔捧下盤。