本文重點
76人真係要等AI艾佛遜救駕？尋日作客山貓輸105:106嘅76人，唔經唔覺原來已經9連敗，最慘係球隊近期大受傷兵問題困擾，好彩聽朝佢哋作客金塊會有「復出」球壇嘅「戰神」艾佛遜登場打救，就算贏唔到，點睇都唔似會大敗。76人受讓金塊10分，梗係捧下盤啦！
易建聯撞爆嘴縫50針
近態低沉嘅76人，尋日朝撞着啱啱輸完畀「魚腩」籃網嘅山貓，以為係反彈好時機，點知76人帶住7分入最後一節，都係晚節不保飲恨輸一分，枉費伊古達拉攞到22分、11籃板同7助攻嘅努力。
尋日開始已經跟隨76人操練嘅艾佛遜，預計聽日對金塊就會上演佢重返母會嘅處子戰，雖然話球隊近排飽受傷兵問題困擾，但隨着星級大前鋒布蘭特傷愈重返正選，76人今仗應該會畀到西岸勁旅金塊重大壓力。另外，効力籃網嘅中國球星易建聯，上周末喺進行3人籃球練習嗰陣意外整傷嘴唇，需縫50針治理。