阿堤斯喺NBA壞事做盡，日前佢接受訪問時自爆，初出道効力公牛時，成日喺半場返入更衣室飲酒：「嗰時我將支酒收埋喺儲物櫃，仲成日走去球場附近嘅酒舖買酒。」阿堤斯解釋之所以飲酒，全因公牛當時戰績低迷。

好彩阿堤斯依家已經戒咗呢個壞習慣，仲唔介意做輔助高比拜仁嘅角色，難怪湖人今季成日喺第3節已經拋離對手，相信聽日主場對住只有韋迪一個有威脅嘅熱火，少讓6.5分可以順利開出上盤！

籃網開季18連敗

同湖人相反，愈打愈衰嘅籃網果然難逃一劫，主場101:117不敵小牛連輸18場，創出NBA史上最差開季紀錄。籃網尋日第1節仲同小牛打成28平手，點知第2節竟然狂失49分。依家籃網可以話信心盡失，聽日喺主場對山貓受讓5.5分，都係捧上盤為妙！至於啱啱輸畀雷霆嘅76人就有好消息，球隊Icon艾佛遜正式回巢，簽咗份1年年薪130萬美元合約，最快可以喺周一上陣。