明鬥小牛凶多吉少

據ESPN報道，其實雲達維治本來唔想做教練，因為佢覺得自己未夠經驗，直至籃網答應請埋夏里士出任助手。綽號「銀狐」嘅夏里士來頭唔細，早喺81年就率領火箭殺入總決賽，95年帶領湖人仲攞埋最佳教練，上季佢喺公牛曾經擔當類似角色，輔助初執教鞭嘅迪尼高，結果成功殺入季後賽。當然雲達維治亦未免太謙虛，事關佢打過NBA13年，入選過兩屆明星賽，傳聞佢係NBA目前one on one最佳教練之一，備受球員尊敬。

可惜籃網到聽日先至正式確認呢次任命，所以聽朝主場對小牛，籃網會繼續由助教巴利斯揸旗，睇個勢好大機會再輸一場，創出NBA史上開季最差嘅18連敗紀錄，受讓10分都係捧番對家為妙！（廣東體育周四早上8:30直播）