為咗游說艾佛遜復出，76人認真有誠意，尋日喺作客小牛前夕，派出教練艾迪佐敦、總經理史堤芬斯基同主席史尼達，喺達拉斯同艾佛遜及其經理人會面，雙方足足傾咗接近兩個鐘，可惜事後雙方未能達成任何協議，但據講，76人已準備派出前艾佛遜隊友、現任球隊助教麥基跟隨艾佛遜返費城，繼續游說工作，希望「AI」趕得切喺香港時間下個禮拜二主場對金塊時上陣，一名內部人士更言之鑿鑿咁話：「艾佛遜一定會重返76人！」

盼最快下周二登場

其實76人之所以咁急想簽番「AI」，全因首席控衞路易斯威廉士啱啱重傷證實要抖8星期，76人冇咗佢之後成績急轉直下，尋日作客小牛，更畀對方嘅泰利喺完場前1.4秒「絕殺」，輸102:104錄得7連敗。另一方面，76人亦希望簽入艾佛遜刺激入座率，唯一擔心係當路易斯威廉士復出後，「戰神」會唔會介意打番後備。

但係76人主將伊古達拿尋日喺言談間亦似乎唔係太鍾意「AI」：「我哋進攻嘅系統非常複雜，艾佛遜肯定要花唔少時間去適應。」艾佛遜重返76人係好定壞？的確好難定斷！