76人近排認真黑仔，繼史比迪斯同布蘭特後，今季大勇嘅後衞路易威廉士啱啱又重傷要抖8個禮拜，搞到早前表示對艾佛遜只有小小興趣嘅76人，近排真係認真考慮簽「戰神」返嚟打救佢哋。

作客小牛受讓都咪掂

據早前第1個爆「戰神」退休嘅費城著名記者史密夫講，76人依家真係好想簽艾佛遜，教練艾迪佐敦更準備飛去亞特蘭大同艾佛遜傾吓有關回巢後喺76人擔當嘅角色。唯一較遺憾嘅係，由於艾佛遜已經好耐冇比賽，所以就算如願回巢76人，當地傳媒估計佢最快都要下個月7號對金塊先可以上陣。

76人鬧兵荒，聽日作客小牛睇怕都係凶多吉少。雖然小牛尋日作客騎士輸95:111，防守唔掂，但進攻就非常犀利，魯域斯基同「最佳第6人」泰利各自有27同25分進帳，今鋪對住76人，讓6.5分要開上盤可謂易過借火。