讓得起公鹿4分

一向喺籃底玩晒嘅杜域侯活，近期好似迷失咗方向咁，竟然連續5場得分喺20分以下。尋日作客鷹隊，本來佢喺上半場都冇乜料到，直至喺半場時獲教練雲根迪提點要醒目啲同硬淨啲先開番竅，結果「魔獸」喺下半場狂取16分、10個籃板同3次封波，全場獲得22分同17個籃板嘅「雙雙」佳績，加上卡特同後備奇兵安東尼莊遜分別射入21同17分，最終協助魔術喺第3節一度落後14分劣勢下，最後成功反勝鷹隊，終止對方開季主場7連勝走勢，兼錄得今季首次兩連敗。

賽後杜域侯活表示：「我喺下半場出嚟時，心入面就只諗住相信隊友，自己就嘗試控制內線。」魔術尋日順利贏波，賽後仲以1場勝仗反壓鷹隊、騎士同塞爾特人升上東岸榜首，聽日佢哋作客兩連敗嘅公鹿，為保榜首少讓4分梗係要捧上盤啦！