今季異軍突起嘅鷹隊，聽朝會喺主場同魔術合演東岸「榜首大戰」。鷹隊今季可以話步入收成期，成班球員愈夾愈熟，呢場對住繼續缺少首席控衞尼爾遜嘅魔術，受讓3.5分下盤絕對博得過！（now671台周五早上9:00直播）
鷹隊近年進步神速，前季以東岸第8殺入季後賽，上季更取得第4名。今季乘勝追擊，暫時取得11勝3負，力壓塞爾特人同騎士，同魔術並列榜首。鷹隊今季之所以成功突圍，全賴球隊保持原班人馬，一班球員夾慣夾熟，自然愈有默契。
5正選今季進步神速
事實上，鷹隊今季5名正選，個人數據都有明顯進步，除碧比外，全部都有雙位數字平均得分，當中以祖莊遜最突出，由上季平均攞21.4分同4.4個籃板，升至今季22.6分同5.3個籃板。雖然碧比上場對黃蜂時左腳拗柴，聽朝未知可唔可以趕及復出，不過今季由勇士來投擔當「第6人」嘅哥羅福表現異常稱職，平均每場有16.7分，係球隊平均得分第二高球員，話唔埋呢場擔正會有驚喜。
魔術威廉士表現飄忽
上屆NBA總亞軍魔術，今季矢志捲土重來，簽入「飛人」卡特增強實力，到目前為止效果算係唔錯，啱啱仲取得5連勝，但其實球隊唔係冇隱憂，就係首席控衞尼爾遜早排受傷要抖一段日子，可惜代替佢嘅積遜威廉士表現唔算太穩定，今場作客鷹隊，頂多只係五五波，讓3.5分真係捧唔過。
