走入茶餐廳食飯，有時難免嫌A餐太肥膩，B餐煎炸太熱氣，但如果有愈食愈弗嘅N餐你又有冇興趣？NBA球隊太陽控衞拿殊（Steve Nash）今季表現着晒火，唔講實在唔知佢已經35歲，當中原因正在於飲食得宜，早前佢更喺Facebook公開私伙菜單「Nash Diet」，日日跟住呢份N餐嚟食，唔知會唔會好似佢咁弗呢？

喺體能需求極高嘅NBA之中，一個踏入35歲嘅球員少不免會被斷定為步入黃昏生涯，但拿殊偏偏用表現證明自己寶刀未老！開季至今僅僅14場賽事，佢已經8次交出單場雙位數字助攻，帶領太陽以11勝3負排西岸第一，能夠有咁火熱嘅表現，全賴拿殊對飲食有自己一套！

奧尼爾杜利跟住食

原來拿殊為咗喺球場上保持高水準，多年來堅持食得健康嘅原則：「我會盡量食天然食物，遠離所有加工食品，甚至麵包同pasta都可免則免。」佢早前更喺Facebook公開自己嘅心水N餐（見N餐菜單），當中主要材料都係生果、蔬菜同果仁，睇嚟又無講大話噃！

除咗喺網上公開餐單，拿殊平日亦會拉埋隊友格蘭希爾分享健康心得，搞到同隊嘅小前鋒杜利亦心郁郁：「當你睇到拿殊咁弗嘅身形，你就明白如果佢日日都食快餐，依家根本就無可能繼續打NBA。」耳濡目染之下，杜利亦已經參考拿殊嘅飲食建議，結果足足瘦咗10磅，甚至前隊友奧尼爾亦受惠於N餐，高呼愈嚟愈弗！

事實上，拿殊除咗公開菜單之外，亦提供咗幾個健康小貼士（見附表），當中極之重要嘅就係充分休息，睇嚟要好似拿殊咁愈打愈有，生活嘅細節真係唔可以忽視！

健康小貼士

‧當想補充身體嘅碘解質，最好方法係飲椰汁！

‧充足睡眠對場上表現有極大幫助，拿殊坦言每日連午睡在內要瞓八個鐘！

‧想健康，最好要日食六餐！拿殊認為同每日食三大餐相比，分開六餐每次進食較少分量會更健康！

拿殊小檔案

全　　名：Steve Nash

出生日期：1974年2月7日

出生地點：南非約翰內斯堡

身高/體重：1米91/81kg

家庭狀況：太太Alejandra Amarilla，Lola及Bella一對女兒

喜歡運動：足球、籃球、曲棍球

‧酷愛足球，甚至不時於慈善足球賽中亮相，原來佢最鍾意嘅球隊係英超熱刺！

‧與効力小牛時代隊友魯域斯基交情深厚，曾要求對方成為一對女兒Lola及Bella嘅教父。

‧弟弟Martin Nash係職業足球員，効力美甲球會溫哥華白帽。