向自己個籃射3分被喪鬧

話說「意外」發生喺紐約人日前作客籃網喺第一節完結前0.5秒，當時尼特羅賓遜喺自己半場攞住個波，根本冇時間過半場起手，本來企定定等球證吹雞冇事，點知呢名「入樽王」突然向自己個籃射3分兼入埋，雖然因為出手一刻已經過鐘被判無效，但尼特羅賓遜入番後備席後即時被教練迪安東尼捉住鬧，最後尼特羅賓遜全場只得6分鐘比賽時間。賽後迪安東尼仲話：「當你隊波得2勝9負時，仲走去做無聊嘢肯定係錯。」

本來外間有傳尼特羅賓遜會被罰內部停賽，但最後呢位「惡搞王」成功逃過處分，尋日主場對塞爾特人仲獲「解放」，出場27分鐘射入19分，可惜紐約人最後因加時最後一刻，被綠軍嘅加納特入波「無仇報」，又輸一場。