大約20年前，塞爾特人球星「小鳥」布特曾經喺季前賽籃框後入波，無奈當時NBA唔容許，被判無效。時至今日，NBA改例後呢種入波方式已判有效，但因難度太大，一直冇人敢做，依家高比拜仁創造經典，將成為「小飛俠」14年職業生涯又一精彩鏡頭。

NBA周一賽果

常規賽周三賠率

弗爆再鬥「61分」紐約人

話說射入全場最高26分嘅高比拜仁，第一節尾段喺底線背對雷霆新秀占士夏登，高比轉身後發覺已被對方逼出底線，於是選擇Fadeaway起手，結果籃球從背面越過籃板射入。賽後高比拜仁表示：「我一早察覺球例已經改咗，容許我咁做。但老實講，呢球有少少符碌。」

不過隊友奧當就唔認同：「大家都覺得佢射入呢球好似喺度玩，查實高比平時練波嘅時候，已經成日入埋啲大家平時唔會見到嘅波。佢真係太不可思議，無論喺球場邊個位，都唔驚射波。」

聽日湖人將會繼續喺主場對紐約人，呢次亦係高比繼2月2號喺麥迪遜廣場公園射入職業新高61分後，首次再對紐約人。以高比今季嘅勇態，呢場話唔定會再創歷史，湖人主場讓9分，上盤絕對值得一試！