賴罰球唔夠多

衞冕MVP嘅勒邦占士，尋日多次犯上低級失誤，面對面交失波、air ball，面對仇人史堤芬遜，更因為沉唔住氣多次侵犯對手，最後勒邦占士更喺佢拿手嘅入樽失手，整傷左手手腕。雖然占士全場有34分同9次助攻，可惜亦有6次失誤，喺第4節7射更只得3中，最後累騎士自08年4月後，首次喺領先17分下輸波，同時自95-96年球季後，首次未能對巫師取得3連勝。巫師尋日贏波，可謂全靠之前因膊頭受傷，尋日處子登場嘅占美臣，呢位前明星賽球員個人獲取31分同10個籃板，再加上卡朗畢拿同亞連拿斯各有19同18分下，呢對「三巨頭」成為巫師反勝嘅功臣。

之不過，尋日騎士輸波，其實亦唔可以怪晒占士，事關奧尼爾同華拿祖都因傷缺陣，最後騎士除咗占士之外，冇人得分超過10分，亦冇人喺籃板或者助攻達到雙位數字。賽後占士歸咎球隊輸波，全因雙方罰球比例竟然係15同35之比，認為球證偏袒主隊：「巫師好明顯比我哋得到更多罰球，我哋次次被人侵犯都冇人吹。」