09年NBA新秀臥虎藏龍，寶物沉歸底！正當今年選秀狀元、榜眼同探花分別因傷同上陣時間不足，發展陷入困局之際，一眾選秀排名較後嘅「二線新人」竟先後爆出，喺季初搶晒鏡。羅臣、貝理雅同真寧斯正係當中表表者，就連金塊同馬刺爭標，又或者公鹿想重振雄風，睇怕都要靠佢哋呀！

一提起今年新秀，大家肯定會即時諗起狀元格芬，只可惜呢位被寄予厚望嘅快艇新人，由臨開咧一刻突然受傷開始，就一直抖到依家。至於話榜眼坦桑尼亞長人泰亞拔，空有7呎3吋身高，至今僅獲灰熊給予平均每場唔夠7分鐘嘅上陣時間，平均只得0.7分同1.8個籃板。効力雷霆嘅探花占士夏登叻少少，有平均15分鐘上陣時間，但都係得5.2分同2.8個籃板，可以話係雷聲大、雨點小。

羅臣貝理雅分擔前輩工作

不過，如果就咁睇死今季新人就肯定大錯特錯，以金塊為例，開季至今取得5勝2負，唔少球迷都將佳績歸功於比立斯同安東尼，但查實被金塊以首輪第18位揀中嘅羅臣，已經成為球隊不可或缺一員。司職控衞嘅羅臣目前平均上陣時間超過20分鐘，得11.7分，佢除咗作為比立斯替補外，仲可以拍住比立斯一齊打雙控衞戰術。對於後輩評價，比立斯話：「我哋一齊上陣確實畀到對手好大麻煩。」

要講新星，當然唔少得馬刺前鋒貝理雅，佢6呎7吋高，265磅，夠晒「件頭」，能夠分擔鄧肯內線工作。以次輪第7位先至被挑選，竟能交出平均7.8分同7.6個籃板成績，將會係馬刺爭總冠軍嘅秘密武器。

真寧斯變領軍人物

至於以首輪第10位獲公鹿揀中嘅真寧斯，就已經喺球隊挑起重擔。身高得6呎1吋嘅佢，目前喺隊中上陣時間、得分同助攻數據都排頭位，公鹿現時有6成勝率，佢可謂居功至偉。對於自己嘅精彩演出，真寧斯回應：「我真係冇諗過咁順利，我只係盡力去打同學習。」抽得早都未必好，09新人仲有大把等住爆發呀！

真寧斯–公鹿控衞

出生日期：1989年9月23日

選秀排名：首輪第10位

今季平均數據：

上陣時間：32.8分鐘

得分：18.8分

助攻：4.8次

羅臣–金塊控衞

出生日期：1987年11月3日

選秀排名：首輪第18位

今季平均數據：

上陣時間：21.7分鐘

得分：11.7分

助攻：2.5次

貝理雅–馬刺前鋒

出生日期：1989年4月22日

選秀排名：次輪第7位

今季平均數據：

上陣時間：18.6分鐘

得分：7.8分

籃板：7.6個