本文重點
趁住對手灰熊有明星後衞「AI」艾佛遜扭計放假影響軍心，快艇尋日朝喺主場以113:110屠宰灰熊取得3連勝，追平球隊上季嘅最佳連勝紀錄。不過，快艇呢3連勝其實對手偏弱，根本不足為據，今日佢哋喺主場迎戰黃蜂就算話受讓2分，都一樣玩唔過，要上盤好過。
快艇難敵黃蜂
因為不滿打後備同灰熊教練賀連斯鬧不和嘅「AI」，尋日賽前索性透過經理人同球會傾掂數，以私人理由要求離隊無限期放假，並隨即飛咗返去亞特蘭大屋企。本來已經實力麻麻嘅灰熊，加埋內亂影響，更難有好發揮，結果就算有小前鋒基爾打出水準攞到33分，最後一樣輸波，快艇嘅贏波功臣則係獨取26分及9個籃板嘅卡文。
不過，筆者睇過快艇近績，近期3連勝只係砌低「西岸3弱」包括木狼、勇士同灰熊，根本冇乜出奇，反而今場對住有「超級控衞」基斯保羅壓陣嘅黃蜂，睇怕凶多吉少。