本文重點
NBA選秀從來講究眼光，例如巫師喺01年以狀元籤揀選不成大器嘅加美布朗，至今仍然畀球迷笑到面黃！但眼光獨到嘅球隊，往往可以喺低順位發掘到一級球星，唔信？你哋知唔知NBA助攻紀錄保持者嘅爵士控衞史托頓，原來喺84年選秀會連頭十名都不入？
黃蜂Trade走高比最經典
既係NBA助攻紀錄保持者，又喺09年入選名人堂，相信唔會有人質疑史托頓嘅籃球成就。但原來佢84年參加選秀期間，僅僅喺第1輪第16位被爵士選中（見附表），始終史托頓身高僅6呎1吋重170磅，難免被人質疑可否喺NBA生存，再加上同年選秀會上有波神佐敦同中鋒奧拉祖雲坐鎮，受到冷落係可以理解！
時至今日，NBA球隊亦繼續因為「無信心」呢3個字而不時走寶，經典例子必屬湖人得分後衞高比拜仁，當年佢直到第1輪第13位至畀黃蜂揀中，然後再直接交換湖人中鋒迪華斯呢？所以NBA選秀最重要係膽識同想像力！