本文重點
尋日湖人有拜林同加素兩大主力缺陣，09年NBA總決賽MVP高比拜仁即刻展現王者之風獨挑大樑，個人拿下41分，引領湖人主場以114:98力克灰熊。取代咗名宿張伯倫成為史上最年輕取得24,000分球手嘅高比仔，今期手風大順，聽朝主場迎戰黃蜂讓6.5分，上盤一樣信得過。
最年輕24000分球員
兩大主力缺陣，「神經刀」奧當又突然夢遊球場只得3分，好彩高比仔交足貨領軍贏波。佢喺今仗完場前2分鐘射入嘅2個跳投，仲令佢以31歲75日之齡，打破咗張伯倫保持嘅31歲113日射入24,000分嘅最年輕球手舊紀錄，同時佢仲趕過「AI」艾佛遜，進佔NBA史上得分榜第16位，今仗續居灰熊後備嘅「AI」只係上陣22分鐘射入8分。
湖人聽朝喺主場迎戰黃蜂，雖然話拜林同加素仲係上陣成疑，但新加盟嘅阿堤斯其實表現都唔差，依家讓黃蜂6.5分唔算少，但讓得狠先反映到莊家信心。