今夏多支球隊積極加碼爭標，再冇話好似之前幾季由兩、三支球隊壟斷。塞爾特人尋日喺主場出擊迎戰太陽，賽前都係一面倒睇好「綠軍」可以贏波，點知就算佢哋守得住太陽球星拿殊同史杜迪米亞，最後都係畀鳳凰城奇兵積遜李察遜搞掂。之前一仗對住魔術捧蛋嘅積遜李察遜，全場拎到34分同10個籃板，成為太陽以110:103贏「綠軍」嘅功臣。

雷阿倫揚言未驚過

另邊廂金塊作客熱火輸88:96，戰果同樣出人意表，事關熱火首席球星「閃電俠」韋迪表現失準，頭5次起手全部落空，全場只得開季個人新低嘅22分，但多得隊友發揮團結精神，以謝美奧尼爾為首等綠葉均打出高水準，金塊縱有安東尼取得30分，依然獨力難支，開季5連勝走勢告終。

目前以6勝1負，勝率達85.7%力壓包括熱火、魔術、太陽、金塊同湖人五支球隊獨佔鰲頭嘅塞爾特人，陣內主將雷阿倫聲言對遭逢首敗未驚過：「我好滿意目前排名，我哋好快就可以將錯誤修正，繼續向前邁進。」塞爾特人今晨將會作客籃網。