擁有NBA最頂級火力嘅太陽，以拿殊為首嘅6支大炮聽朝將會瞄準塞爾特人嘅大閘門進攻。只可惜，受到地獄賽程困擾，鳳凰城尋日已經遭到魔術打破不敗金身，喺多支大炮突然啞火下，想攻陷由加納特同柏堅斯領導嘅NBA No.1防線，恐怕機會渺茫，就算話鳳凰城受讓7分，都係玩上盤穩陣。（now670台周六早上8:30直播）

開季4連勝嘅鳳凰城近排踏入地獄賽程，要連續進行5場作客戰，雖然第1關硬撼熱火順利通過，但尋日朝第2關遇上上季東岸冠軍魔術，就即刻冧檔輸100:122，你話嚟緊連場硬仗仲可以點捱？

太陽比賽末段乏力

冇錯，太陽嘅火力依家喺NBA排第二，平均每場去到111.2分，陣內就有包括拿殊、格蘭希爾、史杜迪米亞、菲爾、積遜李察遜同巴布沙平均得分突破雙位數，只可惜巴布沙扭傷右手手腕已經抖咗2場，對住有「飛人」卡特缺陣嘅魔術，又只有拿殊同史杜迪米亞有貨交，今晚對住防守出色嘅「綠軍」，形勢將會更加惡劣。

尋日以92:90勇挫木狼造出6連勝嘅塞爾特人，目前平均失81.5分仍係NBA最少，除咗話佢哋內線穩健之外，擅長偷波嘅朗度同經驗老到嘅皮雅斯喺防守上亦都貢獻良多，令對手進攻往往舉步維艱。始終「綠軍」三巨頭加納特、雷阿倫同皮雅斯實力超班，新加盟嘅拉舒華萊士又係最佳第六人，只要好好發揮戰術以守為攻，要贏疲兵鳳凰城應該難度唔大，特別係當客隊末段乏力，比分只會愈拉愈開。