阿利沙同阿堤斯尋日喺火箭對湖人一戰互相倒戈，兩人為面子鬥餐死，又開肘、又鬧交、最後仲鬥射絕殺，但最後都被全場獨取41分，帶領湖人作客經加時後以103:102險勝火箭嘅高比拜仁搶晒鏡。
尋日一仗係阿利沙同阿堤斯首次倒戈，兩人開波冇耐已經互講廢話挑釁對手，之後仲鬥開肘，各食一次技術犯規。
完場前阿堤斯同阿利沙又引發高潮，阿堤斯完場30秒射入3分波，得戚地做出一個暫停手勢示威，點知阿利沙喺完場前14秒還擊一個3分波，令雙方打成92平手打加時，結果湖人最後憑高比喺第4節同加時階段射入16分，全場狂取41分下，加上費沙成功偷走阿利沙嘅最後一擊，連續兩場加時勝出。賽後同阿堤斯一樣都有15分嘅阿利沙勁唔忿氣：「我抬頭望個鐘，發現得番4秒，於是搵機會出手，點知畀人偷咗，真係好沮喪！」