本文重點
聽朝NBA上演多場大戰，其中金州勇士會喺主場對洛杉磯快艇。快艇上季重金羅致巴朗戴維斯，可惜此子加盟後未能發揮應有嘅水準，預計今場喺狀元格芬繼續缺陣下，勇士少讓2分，上盤同大盤均可一試。（有線165周六早上11:30直播）
金州勇士近年最佳代表作，絕對係06-07年球季，當年佢哋以「西岸老八」身份打入季後賽，結果喺史堤芬積遜同巴朗戴維斯帶領下，喺第一圈爆冷以4:2淘汰一哥小牛晉級。可惜巴朗戴維斯喺08年轉會快艇，自此史堤芬積遜就一直醞釀離隊，幸好球會今季成功留用佢。
博勇士尾節反勝
雖然快艇上季成功引入巴朗戴維斯，可惜此子未能打出喺勇士嘅水準，平均得分由前季嘅21.8分狂降至上季嘅14.9，今季更跌至11.4分。另外，快艇本來希望今季藉狀元格芬翻身，點知呢名大前鋒，未開咧已經重傷要抖8個禮拜，係快艇暫時只得1勝4負嘅主因。
值得一提，勇士開季頭3場比賽，得失分都過百，今場大盤絕對係出擊重心。另外，快艇頭5場比賽，有3場嘅第4節得分喺17分或以下，勇士有力乘虛而入取得大捷。