正所謂家有一老，如有一寶！塞爾特人、太陽同金塊尋日都順利贏波，繼續保持長勝，可以話全靠拉舒華萊士、拿殊同比立斯「三老」，一班後生仔學嘢啦！

拉舒3分球8射6中

先講塞爾特人，「綠軍」尋日作客以105:74揮低76人，「三巨頭」入面，只有皮雅斯表現較突出，佢哋之所以取得大勝，可以話全靠倒戈家鄉球隊嘅拉舒華萊士，呢位35歲老將今季喺塞爾特人擔當「第六人」嘅球星，尋日打到上晒身，3分波8射6中，全場獨取20分，絕對係「綠軍」取得5連勝嘅頭號功臣。賽後呢位35歲嘅老將話：「呢度係我嘅屋企。雖然今場波我有好多朋友同屋企人冇嚟睇，但每次我嚟到呢度打波，都覺得好開心。」

拿殊下半場屈機

同樣係35歲，太陽控衞拿殊尋日嘅表現更可以用「屈機」嚟形容，喺作客熱火一仗，全場狂轟30分，單喺下半場就射入25分，另加8次助攻，加上喺第四節，領導球隊今季首次使用聯防亦頭頭是道，令熱火命中率急降至23%，最終成功帶領太陽反勝104:96，自04至05年球季後，首次開季取得4連勝。

比立斯玩低調

相對拉舒同拿殊，33歲嘅金塊控衞比立斯尋日就比較低調，帶領金塊作客大勝溜馬111:93取得4連勝後，一句嘢都冇講，但唔代表佢冇表現。事實上，比立斯尋日射入24分，拍得住射入25分，近期弗到爆嘅安東尼。究竟一班老將仲咁勁，係佢哋keep得好？定抑或NBA一代不如一代？呢個問題就要留畀大家研究喇！