本文重點
「巨無霸」奧尼爾返嚟啦!騎士季初經歷兩連敗之後,人人都話現年37歲嘅奧尼爾回晒塘,又話佢佗衰家,真係幾難聽嘅說話都噏得出。奧尼爾日前用行動回應批評,打出自加盟騎士以嚟最掂一仗,協助騎士以102:90擊敗巫師。騎士家陣連贏3場,聽朝強勢鬥公牛有望再下一城!
搶晒占士鏡
入樽、封波、助攻瓣瓣有,連最唔掂嗰瓣罰球都10射7中,奧尼爾昨仗重拾昔日風采,個人貢獻21分兼搶到8個籃板,比起同樣有雙位數字得分嘅勒邦占士同莫威廉士更搶鏡。賽後「巨無霸」話:「我唔係後生,畀人睇小好正常,所以我更加需要打爭氣波,話畀球迷知我仲得嘅!」
連贏木狼、山貓同巫師之後,聽朝騎士會喺主場恭候公牛,後者今季有哥頓離隊,搞到戴歷羅斯負擔重咗,開咧戰績亦欠理想,睇怕聽朝都係凶多吉少,騎士讓8分上盤玩得過。

