一代「戰神」淪為後備？今季加盟灰熊諗住東山再起嘅艾佛遜，尋日一復出竟淪為後備，最後目睹球隊作客經過加時後，以116:127不敵帝王，賽後「AI」大發雷霆，似乎同教練賀連斯正式決裂。

艾佛遜尋日終於復出為灰熊首次披甲，不過令人意外地，「AI」竟然先列後備，全場上陣亦只有18分鐘得11分。賽後「戰神」表示自己腿筋已經冇問題，但就非常唔滿意教練賀連斯安排佢嘅出場時間：「唔該去睇吓我嘅履歷，呢樣嘢證明我唔係一名第六人。我唔覺得我獨食有問題，因為正係呢種打法令我喺NBA取得成功。」

放大圖片

放大圖片

易建聯傷右膝籃網4連敗

其實帝王尋日對灰熊真係打得好激，艾佛遜出得18分鐘真係少得滯，最後帝王憑後備烏特列完場前1秒上籃得手逼和110打加時，加上奇雲馬田射入48分，包括7個3分波，最終成功反勝灰熊，打開今季勝利之門。呢場勝仗，亦令今季開始執教帝王嘅教練韋斯菲，取得球員加教練生涯第100場勝仗。

尋日同艾佛遜一樣咁慘嘅仲有易建聯，呢位中國球星對山貓時被對方球星謝勒華萊士撞到右膝痛苦倒地，據報傷勢唔輕，籃網亦喺「阿聯」受傷後，超過10分鐘未入過波，打破公鹿06年創造最長時間冇入波紀錄，最後被山貓反勝79:68錄得4連敗，聽日主場對住西岸一哥金塊都係難逃一劫！