冇姚明？冇麥基迪？冇問題，火箭仲有新兵阿利沙！尋日喺主場迎戰新勢力拓荒者嘅火箭，最後憑阿利沙交出個人歷來最高嘅33分，以111:107贏波。火箭聽朝會乘勝追擊爵士，受讓3.5分都幾抵玩。
今場波拓荒者其實都算交出水準，其中重心球星萊爾個人獨得42分，只係火箭有阿利沙同射入28分嘅布魯克斯打出超水準，全隊投射命中率仲去到50.6%，終令拓荒者束手就擒。今季過檔火箭期望有更多出場時間嘅阿利沙，賽後仲公開要求隊友要保持高水準向列強宣戰，咁有鬥志，聽朝點可以唔捧你場先？
至於今季同阿利沙互換球隊去到湖人嘅阿堤斯，就得到美國天后Tony Braxton邀請佢拍新歌個MV，雖然阿堤斯喺新球隊仲未完全適應，但就先把握到機會喺當地娛樂圈出位，都算實現咗佢個目標之一吖！