話說喺今仗首節，一隻蝙蝠飛咗入球場，球證無奈之下要暫停比賽，但當蝙蝠喺上空盤旋之際，真路比利就用佢隻幽冥鬼手將蝙蝠「擊落」，然後再拎出球場交畀工作人員，據講當時球場隨即播起《蝙蝠俠》嘅主題曲，除咗球迷之外，就連帝王球員都向呢位阿根廷國手報以掌聲！對於自己嘅「壯舉」，真路比利話：「唔可以入樽，咪搵其他方法搶鏡囉！打低隻蝙蝠，我唔覺得有咩大不了喎！」

講番場波，馬刺又由頭贏到尾，柏加做咗最佳球星，個人獨取24分加7個助攻，反而中鋒鄧肯就演出走樣，僅得7分。被視為有力挑戰湖人西岸霸主地位嘅馬刺，由上仗不敵公牛後迅速反彈，依家開季3戰得2勝1負，希望呢隻蝙蝠會係佢哋爭標吉兆啦！