本文重點
騎士終於打開勝利之門！呢支上季東岸冠軍，經歷開季兩連敗後，尋日作客終以104:87大炒木狼，不過想上番「一哥」仲有排行，皆因塞爾特人主場以118:90輕取公牛，取得3連勝！
相比起頭兩場對塞爾特人同速龍，騎士尋日面對實力差一皮嘅木狼，簡直係予取予攜，「大帝」勒邦占士只係上陣咗33分鐘，第四節幾乎冇出過，但仍然取得24分、9個籃板同6次助攻。不過「巨無霸」奧尼爾就仲係冇料到，受個犯困擾，全場上陣只有19分鐘，得6分同7個籃板。賽後伊高斯卡斯承認騎士進攻着重走動，對奧尼爾嚟講的確比較難適應，佢哋亦需要多啲時間去了解奧尼爾幾時想要波，照咁講下次見騎士讓分讓得太多記住要小心喇！
綠軍3連勝可以再追
相比起騎士，同樣加入咗拉舒華萊士呢名球星嘅塞爾特人，就明顯已經run順晒，尋日主場對番喺上屆季後賽打到第7場先分到勝負嘅公牛，憑住「三巨頭」加納特、皮雅斯同雷阿倫合力轟入58分，其中皮雅斯喺第三節更加着晒火，取得全場22分嘅20分，包括5個三分波，最終帶領「綠軍」以28分大炒公牛，取得三連勝，狀態弗到漏，相信聽日喺主場對住黃蜂讓9分亦冇問題，推介上盤！
文：勒邦芝士