10度入選明星隊、4度榮膺得分王，唔睇籃球嘅人都知艾佛遜有幾猛料。呢位34歲老將上季飽受屈辱，喺活塞坐多過打，對呢位「戰神」嚟講係職業生涯入面最大嘅恥辱。新季「AI」轉會到灰熊，佢就希望憑豐富嘅經驗成為球隊領袖，領導班後生仔爭取佳績。
基爾崇拜儲戰神錄影帶
艾佛遜甫登陸灰熊，即刻受到陣中球員嘅英雄式歡迎，先係控衞美奧賣口乖，話好榮幸可以同「戰神」並肩作戰，至於小前鋒基爾就直情當AI神咁拜：「我不嬲都有儲開艾佛遜嘅比賽錄影帶，一直以嚟都好崇拜呢位小巨人，希望可以快啲落場跟佢學嘢。」
上季艾佛遜打到咁冇癮，皆因喺活塞得唔到應有嘅尊重，如今喺灰熊受到重視，難怪AI表示：「呢度有好多年輕球員，我願意成為佢哋嘅領袖，帶領球隊邁向成功！」
艾佛遜Allen Iverson
年齡：34
効力球會：孟菲斯灰熊
上季表現：（底特律活塞）17.4分4 .9次助攻 1.6次偷波
增值指數：●●●●