本文重點
卡特今夏由新澤西飛到奧蘭多，新季將聯同杜域侯活、劉易斯同尼爾遜合組「魔術4大天王」，聽到個名都驚。早排魔術就打咗一輪季前熱身賽，司職得分後衞嘅卡特亦有唔錯表現，不過「飛人」依然要努力改善佢嘅弱點—防守弱。
接受雲根迪批評
去屆東岸盟主魔術，喺季前熱身賽做低小牛、熱火、火箭同黃蜂，卡特呢4場嘅投射命中率達40%，黃蜂一役仲貢獻18分，對一位啱啱加盟嘅球員嚟講算有交代。不過，魔術教練雲根迪就唔多滿意，怒轟卡特喺防守上完全冇貢獻：「卡特喺防守上冇做好本分，我唔知佢以前喺籃網點打防守，嚟到魔術就要服從我嘅指令！」
卡特冇因自己名氣大就擺款，反而欣然接受雲根迪嘅批評：「我知自己未做到最好，近期我已經着重練好防守，期望可以同隊友好好配合。」
卡特 Vince Carter
年齡：32
効力球會：奧蘭多魔術
上季表現：（新澤西籃網）20.8分 4.7次助攻 5.1個籃板
增值指數：●●●