高比拜仁、勒邦占士同杜域侯活都係最當時得令嘅球員，新季NBA焦點好難唔落喺佢哋身上。不過今個夏天佢哋嘅風頭統統唔夠3大老將犀利，邊3個？之唔係奧尼爾、卡特同艾佛遜囉！呢3位加埋過百歲嘅老將今夏齊齊轉會，仲各自修行自我增值，似乎密謀喺新球季再闖高峰！
今夏嘅轉會單單哄動，奧尼爾過檔騎士相信係最矚目嗰單。仲未摸熟克利夫蘭嘅奧尼爾，同傳媒講唔知邊度有得蒲，於是把心一橫做乖仔操Fit個body，季前搏晒條老命去瘦身，誓要同堆脂肪講Bye Bye。
打拳踢波瓣瓣啱
奧尼爾早排真係忙到你唔信，呢位325磅巨人打拳、踢波、沙灘排球、游水樣樣玩齊，最近仲犀利，竟然學人走去上瑜伽班！「巨無霸」冇時正經，你以為佢今次係搞噱頭咩，查實佢係嚟真。
話說佢喺克利夫蘭報咗個瑜伽班，女導師舒妮達仲特登幫佢「柯打」咗塊厚墊褥，被問到奧尼爾係咪佢12年教導生涯入面最差嘅學生，呢位女導師就有咁嘅回應：「當然唔係！奧尼爾好投入，雖然佢有好多伸展動作都仲未做到，但明顯睇到佢有進步。」
據講，奧尼爾玩瑜伽玩到上晒癮，仲諗住報埋高溫瑜伽班添！勞碌咗成個夏天，唔少騎士隊友喺訓練場見到奧尼爾都嚇一跳，個個都話未見過「巨無霸」咁Fit。究竟有幾Fit？廣大球迷真係要拭目以待嘞！
奧尼爾Shaquille O'Neal
年齡：37
効力球會：克利夫蘭騎士
上季表現：（鳳凰城太陽）17.8分 8.4個籃板 1.4次封阻
增值指數：●●●●●