「好怕半夜電話響」

生離死別中，死別嘅感覺T-Mac最熟悉不過，因為由佢新人球季効力速龍期間收到好友Henry Andrews車禍喪生消息開始，至愛離世嘅打擊從未間斷（見附表）。但最深刻要算好友兼表弟Ryan McGrady離世，當日T-Mac身處多倫多同女友共進晚餐，當收到消息後直衝返家：「我連當時有冇埋單都唔知。」難為T-Mac仍要經歷一夜無眠，先至可以飛返家鄉送好友最後一程！

接二連三有至愛離開，實在令T-Mac變成驚弓之鳥：「真係試過太多次，所以我好怕半夜收到電話，有時我仲會諗下一個會係邊個。」或者T-Mac唔應該再浪費時間去擔驚受怕，反而要學懂把握現在，抱緊眼前人！