新一季NBA，對麥基迪嚟講將會係許勝不許敗嘅一季，因為步入合約年嘅佢無疑要用僅餘一季表現博取職業生涯最後一份合約！即使撇開實際因素外，T-Mac亦要洗脫高薪低能污名，面子加經濟兩大因素，可以預見佢將會大爆發！
所謂「合約年」，意思係NBA球員嚟到合約最後1年嘅球季。通常球員都會表現特別出色，個個都想藉住搶眼數據，以求續約時向球會爭取更豐厚待遇！T-Mac同火箭將會喺明年夏天約滿，加上佢經已年屆30歲，嚟緊無疑係佢職業生涯最後一份合約，當然要把握機會打出成績博大合約啦！
此外，麥基迪新一季會以年薪2,323萬美元成為全NBA最高薪球員，人工比帶領湖人奪得總冠軍嘅高比拜仁更高！如果T-Mac繼續交出好似上季常規賽平均15.6分、4.4個籃板及5次助攻嘅普通成績，勢必成為球迷眼中嘅高薪低能一族，試問點可以唔爭口氣！