今次T-Mac轉「3」，除咗呢個號碼係佢高中年代用過之外，主要目的係宣揚紀錄片《3 points》，以及慈善活動《Darfur Dream Team》！其中《3 points》紀錄T-Mac07年夏天探訪非洲國家乍得邊境難民營嘅故事，佢唔單止傾聽受戰火洗禮難民嘅悲慘故事，更拋開千萬球星身份喺難民營同食同住，感受極深：「旅程完結嘅時候，我開始意識到佢哋需要一所學校。」

宣傳紀錄片籌款起學校

回國後嘅T-Mac，火速喺08年1月發起活動《Darfur Dream Team》，目的希望喺乍得當地興建學校。T-Mac自己更捐出75,000美元作經費，之後再四出向其他NBA球星募捐，例如湖人控衞費沙同熱火中鋒謝利美奧尼爾亦有支持，大大感動T-Mac：「其實唔少球員都樂於助人，亦懂得關心社會。」

改聘佐敦體能教練

事實上，銳意求變嘅T-Mac除咗戰袍換上新號碼外，連身邊工作人員亦換上新面孔！佢首先同高中年代已經合作嘅體能訓練員韋恩分手，改聘名牌教練Tim Grover，要知道佢係佐敦嘅御用教練，波神多年弗爆體能全屬佢功勞。甚至熱火球星韋迪亦被吸引到起用Tim Grover，結果成功喺上季擺脫傷患，以平均每場30.2分勇奪常規賽得分王！

有韋迪嘅例子擺在眼前，打動T-Mac目前亦喺Tim Grover位於芝加哥嘅訓練中心苦練，佢早前更於公開活動中表示康復進度良好：「我現時身體狀況比上年同期好得多，離復出日子應該唔遠。」或者喺新一季嘅NBA，我哋應該好好期待從「3」開始嘅T-Mac！

姓名：Tracy McGrady

出生日期：79年5月24日

出生地點：美國佛羅里達州

位置：得分後衞/前鋒

身高：203cm

體重：101kg

効力球會：火箭

曾効力球會：速龍、魔術

家庭：太太CleRenda Harris、兩子兩女